詠春師傅江志強：開武館重傳承

2003年對許多香港人是個夢魘。沙士爆發奪走了299人的性命，樓價急跌捲去不少打工仔一生辛苦積蓄，歌星張國榮愚人節墮樓身亡，令許多「哥迷」心碎。對於詠春師傅江志強來說，沙士爆發彷彿是上天給他開了一個荒誕的玩笑。「開館幾日後，竟然遇上沙士，邊有人會上嚟學功夫？ 」

開館遇上沙士爆發

詠春江志強拳術會開館當日，舊雨新知紛紛上館恭賀，猶如走馬燈般，加上舞龍舞獅，場面好不熱鬧。但誰會想到武館開館一連幾天沒有半個學生，只有兩個人在擦擦抹抹。

江說：「沙士期間，邊會有人習武，所以我負責擦左面鏡，最大嗰個徒弟（大師兄梁偉鴻）負責右面鏡。」江師傅與徒弟二人每天都拿著抹布在館內左抹右擦，「當時係武館最乾淨的時候。」他笑指：「街上一個人都冇，邊會有人上館學武；喺街上打個噴嚏，就已經天下個個避開三呎。」雖然他回想起會以「好笑」來形容，但當中的坎坷，是有苦自己知。

不獲師門認同感遺憾

除了出師不利外，江師傅成立拳館最困難的地方是得不到師門認同，他說：「好多人都認為我咁做唔啱，連師父(註一)都唔太贊成，覺得我唔應該四圍去教。」不過，江志強沒有放棄，「點解我繼續想搞落去？因為唔忿氣囉。自己都行咗第一步，未成功之前點可以放棄。就算開館撞上沙士亦不後悔，作為一個承傳者和學武術的人，唔會放後悔喺心。開館是我想做嘅，既然已經決定咗，自己又諗清楚點樣去實現，又點會後悔？」

「不服氣、不後悔」這六個字是他堅持的原因。

重視支持多年的徒弟

從網上得知，江師傅有不少的明星徒弟，是獲南少林邀請教導木人樁的第一人。但他指這不是他最感自豪的地方，最自豪的是多年來有一班徒弟一直跟著他，支持著「詠春江志強拳術會」這個名。拳術會於96年成立，「一開始，我係喺維園同自己屋企教，而跟得我最耐嗰位梁偉鴻（大師兄），1995年已經跟我。」江：「其他嘢（明星徒弟、教南少林打木人樁等）已經無咩需要講，最重要係仲有班一直支持自己嘅徒弟喺身邊。」

同樣一句說話，在一小時的訪問中出現了三次，可想而知，江志強對徒兒們何等重視。

訪問其間，江師傅接到電話，說了幾句話便毫不猶疑拒絕了電話中人。記者細問下去才發現，原來他剛拒絕了一個電視訪問。「佢話（訪問）會牽涉少少政治，有政治就無謂啦，講武術就冇問題。」江師傅對訪問及出鏡看得淡然，利益當前還可以堅持自己的身份，這就是值得尊敬之處。

江師傅示範一招半式，甚具氣勢。(梁加欣攝)

副稿

「打功夫不是練體操﹗」

訪問結束後，記者發現中國武術與其他中國傳統文化一樣，在現代的文化和思想衝擊下，遇到兩個重要難題。第一，在香港這個商業社會中要維持中國武術，很難。江：「租金又不斷升，但冇理由不斷加學費，自己要想其他辦法搞掂。另外，有好多人都抱住試試下的態度上館，當發現唔啱自己或者堅持唔到就會轉去第二間學。所以多年來見到好多人來來去去。我對徒弟冇咩要求，只要佢哋肯練肯堅持，我就會教。」江希望，徒弟可以自律練習，亦鼓勵他們開枝散葉，將詠春不斷擴展及延續下去。

第二，「承傳」二字漸漸消失。江指，現在的中國武術分了三方面，實戰的傳統武術，強身健體的武術和現代武術。但江師傅認為，傳統武術和現代武術最大分別是承傳。「傳統功夫十分重視承傳，所有事物都有根有腳，師父教授徒弟，徒弟再教徒弟。」但現代武術缺了這一環，重視的是招式要耍得漂亮，符合國家規格。

由師徒關係變成教學關係，江師傅認為這令到中國的武術名傳實亡。江指：「現代的武術用來表演參賽，打到好似體操咁。明明我哋只係打一拳，佢地嘅一拳就要打到好似垂死的天鵝咁靚，好難打。」所以他與許多功夫師傅一樣，堅持捍衛中國武術，口傳身授，希望這種中國文化可以這樣承傳下去。

註一：拜了師的稱師父；沒拜師的稱師傅