《蘋果日報》自政府唔發牌俾王維基香港電視後，就出盡吃奶之力，鼓動全城罷睇台慶，惹來無綫絕地反擊，決定封殺壹傳媒採訪。
兩個傳媒巨人嘅關係本來就非常緊密，正如一對夫婦，老婆要靠老公出去賺錢養家，家中柴米油鹽、臉上的胭脂水粉都係拜男人所賜；為人丈夫者想有專人服侍，隨傳隨到，平時就要多愛錫老婆，唔好「有事鍾無艷，無事夏迎春」。
今次女方因為身邊出現一個年青有為，活力奔放嘅男人，意識到自己丈夫暮氣沈沈，46年如一日，無出色，無表現，無突破，對佢諸多指責。終於惹黎丈夫忍無可忍，趕老婆出家門，雖然明知唔能夠再過皇帝式生活，但仍然樂得耳根清靜。老婆亦非省油的燈，眼見小器老公無意卑躬屈膝道歉，唯有自力更生，繼續唱衰老公惡行。
兩公婆明明注定天生一對，閒時鬥下嘴可以增進感情，輪流做下把位，有下台階等對方好好睇睇落台。依家偏偏搞到要硬碰硬，火星撞地球，注定兩敗俱傷。
因為無左壹傳媒採訪，有廣告、公關公司已經表明放棄用無綫藝人，以免活動曝光率減少，影響宣傳效果，無綫變相搵少左錢。每年都搞嘅廣告頒獎典禮，未必可以哄得返啲廣告商。
壹傳媒都唔好得幾多，雖然有一班一線姐仔明星想上蘋果娛樂版，仍然會要求記者除咪牌繼續受訪，但娛樂新聞的而且確比過去遜色。港聞版就更加慘情，《講清講楚》都唔俾採訪，真係死得唔清唔楚。
希望兩公婆床頭打交床尾和，男方都係為啖氣，為面子，拎夠彩之後就要商量點樣不失霸氣地請返老婆返屋企啦。曾麗芳
評語： 兩公婆嗌交的比喻不錯。
兩敗俱傷有實質例子支持，論據有說服力
港聞版就更加慘情，只因《講清講楚》都唔俾採訪，真係死得唔清唔楚？有點言過其實了！結論太輕描淡寫，應想想拖下去會如何？
by Lai Fong, Tsang
