說到排球，大部份人第一時間會想到日本動畫《排球少年》，烏野的主攻手澤村大地有如「地基」般支持排球部不斷突破，戰勝強敵。蕭昌鴻（阿蕭），就是澤村大地，無論在甲一球隊龍隊，抑或香港代表隊，他就是那位能得到隊友信任，支撐球隊面對挑戰。
29歲的「阿蕭」在本地排壇贏盡榮譽，中學獲精英賽冠軍兼最有價值球員等、大學時奪大專盃冠軍、打甲一再贏聯賽冠軍，代表香港在世界大學生運動會更戰勝歐洲球隊，排球就是他的光榮。
即使深愛排球，然而與大眾無異，在中大畢業後都要「搵食」，面對成為「打工仔」的無奈。阿蕭笑言：「大學畢業後多數同學都係做老師或紀律部隊，咁我就跟大隊，誤打誤撞揀咗去懲教，做懲教主任。」
正當人人都認為阿蕭在懲教將一帆風順時，他卻毅然放棄薪高糧準的公務員，突然跳出舒適圈創立本地首間排球學校香港專業排球學校（HKEVA），冀能改變排壇，希望與本地排壇一同進步，慢慢追近足球及籃球等項目。
冀改變排壇培育新血
任職懲教時，一邊返工，作為香港男子排球隊隊長，又要出席港隊及自己在打的甲一龍隊訓練，阿蕭直言或多或少會影響練習及比賽。做了兩年懲教，一直未能找到工作和興趣的平衡點，導致體力下降不少，「每天重複做唔鍾意嘅嘢令我懷疑自己嘅人生係不係真要咁樣過！」於是他鼓起勇氣決定自已人生自己揀。
「可能好老套，但你嘅人生只得一次，你要對自己嘅人生負責，唔好活喺其他人期望中，要活一個無悔嘅人生！我嗰陣繼續做懲教做到五年有福利，七年有宿舍，十年有屋住，唔想再拖，唔想繼續咁落去，再唔選擇就真係一世。」他笑說。
追夢從來不易，更何況是跳離舒適圈，「我以前返懲教嘅時候，返工前會好唔開心，返緊工都會好想快啲放工。但我依家搞排球學校，雖然返公司前都會唔想返，因為覺得教好耐會好攰，但實際教嘅時候又無咗呢個諗法，反而好享受，會唔捨得完。」也許這就是將興趣變成工作的樂趣。
離開懲教後，毫無生意經驗的阿蕭找來3位合夥人著手籌備自己的學校，由於是本地的第一間排球學校，沒有其他同行能夠參考，惟有以本地足球或籃球學校作藍本，再參考亞洲排球強國日本的教育模式，目標對象是15歲以下的小童和對排球有興趣的成人。已變身校長的阿蕭形容，公司短期目標是保持「Quality（質素）」和「Quantity（數量）」，訓練排球精英及營運球隊是最終目標。
創業初期即遇疫情
豈料學校剛剛成立，這位生意素人即遇上世紀疫症，不要說收生，就算有學生都無法開班，剛創業便可能結業，然而阿蕭並沒有氣餒，樂觀面對，笑稱最慶幸的是令他們更容易預算公司的營運成本，「疫情喺我哋創業初期出現比中期才出現好，因為初期投資唔多，只係起步階段，我哋可以預計固定成本，唔會好似其他公司一樣，遇到疫情就意味著面臨極大嘅挑戰。」
由球員變身校長，由被人教，到教人，20年排球生涯中，阿蕭亦非一帆風順，那位影響他最深的正正是他在華英中學的老師兼教練周Sir（周國傑）。
9歲開始打排球，中一時身高已達一米八三，12歲的阿蕭參選香港少年排球代表隊，正值傲氣的阿蕭自以為「入硬」，豈料最後落選，「當時打擊好大，好彩周Sir無放棄我，令我慢慢學懂要謙虛，由嗰陣開始我提醒自己要更加努力，唔可以畀自己有一個唔得嘅原因，所以之後就一直發奮直至今日。無佢就無我，佢改變咗我好多，令我都想透過排球影響更多人。」
落選後阿蕭奮發圖強，中學帶領華英囊括學界及精英賽冠軍，自己一人包辦最佳球員、最佳發球、最佳一傳及最佳攔網四個獎項，升上大專亦助中大勇奪大專盃冠軍，公開賽亦屢助龍隊獲甲一冠軍，贏到開巷，成為長勝將軍。
回顧排球生涯「我冇乜遺憾」
一直長勝，壓力亦愈來愈大，彷彿贏變成正常不過，豈料香港排壇近十年高速發展，仁濟、力臻及青龍等球隊急起直追，「有幾年成日輸畀仁濟，拎唔到冠軍，都開始懷疑自己，嗰排好低迷，但慢慢想開了，學識接受結果，無論幾厲害嘅球員也有打得差嘅時候，最重要唔好畀自己壓力，唔好畀包袱影響自己。」
20年排球生涯，在香港贏到盡，但離開香港卻一直未能獲得好成績，始終香港排球的整體實力仍遠不及外國，但阿蕭在2017年帶領香港大學生男子排球隊，迎來了突破，「最難忘嘅賽事係2017年台灣世界大學生運動會，因為我哋竟然贏咗歐洲球隊，例如智利同澳洲，對香港隊來講仲難過中六合彩。」
先不說歐洲球隊，就算與亞洲臨近國家及地區如日本、韓國及台灣比較，香港在資源及訓練亦遠遠不及。曾赴日本「跟操」的阿蕭說，日本的訓練相當有系統，一日練三節，「香港球員又要返工，放工先去練三個鐘，第二日仲要返工，人哋練一日等於香港練一個星期。但其實我哋唔係無得打，贏到歐洲隊證明香港球員有一定質素去挑戰其他國家。」
近年香港排球的確多了很多人參與，「阿蕭」滿懷熱腔，指現時新媒體發展蓬勃，加上運動漸趨成熟，這兩個因素對香港排球發展影響甚大：「本身排球就多人玩咗啦，加上新媒體嘅影響多人了解呢項運動，相輔相成下香港排球都成熟唔少。」
棄「鐵飯碗」創辦排球學校，阿蕭的目標就是希望為香港排壇出一份力，改變排壇，培養更多新血。
明年亞運，阿蕭稱如有幸再次入選香港隊，背負腰傷的他將最後一次代表港隊出戰，然而卻是他離開舒適圈，為香港排壇發展掀開新一章的開始，之後他將以另一種身分，繼續推動香港排球運動，「回望自己排球生涯，我冇乜遺憾！」
撰文︰孔文秀
編輯︰裴浩輝
圖片：受訪者提供
封面：蕭昌鴻代表港隊在世界大學生運動會擊敗歐洲隊
