如果，命運能選擇，他將再次選擇排球。
蕭昌鴻，香港男子排球隊隊長、香港專業排球學校校長、蕭將軍，中學曾勇奪精英賽最佳球員、最佳扣球、最佳攔網及最佳一傳四個個人將項，囊括甲一冠軍、會長盃冠軍等，無疑他就是香港排球界命中注定的一員，對排球的那團火甚至足以熔化別人眼中的「鐵飯碗」。
紀律部隊，在不少香港人眼中絕對是一份「筍工」，薪高糧準，要求高度自律及體能，運動員再適合不過。中大畢業後，蕭昌鴻選擇了任職懲教主任。
「是否未來三十五年都過咁嘅生活？」兩年懲教生涯，每日返工放工，這是蕭昌鴻返工時問得自己最多的一句。放工後回到排球場練習，那種扣球的感覺、那種球不著地，永不放棄的感覺，原來那個18米乘9米的球場才是他的最愛。
棄鐵飯碗創排球學校
兩年後，蕭昌鴻再次面對「命運的選擇」，「繼續做，5年有福利，7年有宿舍，10年有屋住，唔想再拖，唔想再咁落去，我真正想做嘅係自己所擅長嘅嘢！」去意已決，決心追尋夢想，遞上辭職信，「辭職前一刻，我都仲好忐忑，喺門外來回踱步好耐，連父母都無講，好彩之後佢哋都好明白我！」
遞信後，他著手籌辦香港首間專業排球學校，找來昔日戰友合作，「當初喺大學都教過排球，其他球類活動喺香港十分盛行，所以早已有搞排球學校呢個念頭。」2019年，「香港專業排球學校HKEVA」正式成立，蕭昌鴻變身「蕭校長」。
排球學校？怎會有錢賺？哪裡有場地？怎有家長會「課金」小朋友學打排球？種種質疑接踵而至，然而剛剛起步就遇上新冠疫情，蕭昌鴻再次面對命運的選擇，繼續創業還是重投職場找份穩定工作？「當時都有反思到底離開紀律部隊係唔係正確嘅選擇，好彩自己喺懲教無做滿3年，好彩當年考消防員失敗，如果唔係我都唔會出來搞學校。種種失敗就好似命運嘅安排，又好彩當時HKEVA剛剛起步，無咩投資，所以損失唔大，最多都係自己無收入，頂得住，咁就繼續向前！」
失敗如命運安排，蕭昌鴻說得輕鬆，然而對運動員來說，成功跨越便是成長，如果無法面對，那將一沉不起。9歲打排球，中一時身高1米83，在華英中學遇到他的人生伯樂周國傑老師（周Sir），「當年我好自大，年少氣盛，有過人嘅傲氣，但最後竟然入唔到香港青年軍，當時打擊好大，好彩有周Sir一直鼓勵，好有耐性咁教我！教導我學做人！」命運安排他遇上周Sir，由老師身上學到做人最重要謙虛，態度決定一切，人生永無一帆風順，要堅强才能關關難過關關過。
望香港排球員到海外見識
伯樂，就是那位影響一生的人，年少時由周Sir教蕭昌鴻，今日蕭昌鴻教育下一代，他最希望透過排球學校選拔出更多優秀的排球選手，「可以嘅話，好希望可以畀學生有機會去其他地區或國家打波。為咗提升教學質素，聘請更多優質教練去彌補香港排球運動員時間少嘅問題，同時加開更加多排球班，喺香港不同地區找尋更多場地去發展排球學校。」
場地一直是香港運動員所面對的困難，資源缺乏，加上排球沒有職業運動員可言，與亞洲其他國家如日本及韓國大不同。蕭昌鴻曾遠赴日本「跟操」，「日本訓練有條有理，教練優質，而且每日練幾節，練一日已經係香港練一個星期嘅訓練量，所以好想將佢哋嘅模式帶來香港。」
年近30歲，蕭昌鴻亦有自己的目標，一來希望香港擁有一隊專業的排球職業團隊，能夠跟其他運動一樣，有贊助，有支持，他更自掏腰包建立屬於自己的排球場；其次開始著手準備明年九月的亞運會，要讓自己的身體進入狀態，背負著腰傷的他更表示，如果可以再次入選香港隊，大概會是這位港隊隊長代表香港的最後比賽。
如果，命運能選擇，蕭昌鴻將毫不猶疑地選擇排球，繼續為香港排球培養新秀，「喺排球學校最深刻嘅經歷就係收到學生同家長們嘅感謝！」
撰文︰洪瑛航
編輯︰裴浩輝
圖片：受訪者提供
封面：蕭昌鴻到樹仁大學與學生分享
