文：周子謙
誰說香港體育不濟，睇英超、西甲、NBA、網球、排球等等，屋企睇、Office 偷睇、酒吧睇、茶餐廳都睇，每個月乖乖付錢供月費、睇到要射波唔返工。香港人隨時隨地都可以參與體育，對體育狂熱至極，香港絕對是體育城市。
香港對中國的世界盃亞洲區外圍賽全城矚目，難得睇本地波，連街邊掃地嬸嬸都識叫一句「香港勁揪，We are Hong Kong」，睇到電視直播都滿足不了我們，要走出街睇戶外直播、一於遍地開花。
「齋睇唔買」始於都係天性，體育嘅野都係只可遠觀而不可褻玩焉，強身健體尚可，想做運動員就……做咩事睇唔開呢？
「呀仔，你識得幾多個香港運動員？香港玩體育無前途呀。唔好以為運動員好型，到時個個月搵朝唔得晚，三十幾歲人退役一事無成，就真係唔慌唔型啦。你乖乖地讀書，第時可以去做一個永遠自動當選議員、或者起一條識移位大橋，再叻啲就做一個隨時腳痛嘅醫生，前途無限就真係掂過碌蔗啦。個個都話香港勁揪，如果你真係想係香港勁揪咁過日子，就最緊要成績好。如果唔係，唔慌唔勁揪啦。大個日日都要擔擔抬抬，有排你揪呀。」
我有理由相信經常出入紅磡體育館的陳奕迅、容祖兒、李克勤、楊千嬅等等都是玩體育之人。每次經過都見到唔同人在紅館表演、開show，體育館喎，唔係演唱館喎。佢地仲唔係運動員？連體育館都要可以part-time搵食，香港體育果然有前途。
行政長官在2013年的施政報告中表示會加緊推動啟德體育園區的籌劃工作。不過，因應香港住宅樓宇需求殷切，有人曾經建議政府將啟德體育城改為住宅用地發展。特區政府發展體育的策略是體育普及化、精英化、盛事化。不過，市民點極都唔化，運動可以唔做，但有瓦遮頭唔可以無，就算月入六萬都需要政府幫忙上車。只要上到車，你要我睇咩運動、睇幾耐都得。
撐香港？睇港隊？支持香港體育？香港勁揪！
