田北辰：「一周一行」比「一簽52行」好
消息指深圳將實拖「一周一行」，全國人大代表田北辰表示，已獲港府高層知會有關措施，他認為較「一簽52行」好：「一個禮拜嚟一次，佢要求嘅費用一定會高過持續兩個月日日都嚟，即每一次費用，咁就將成本提高，我覺得係絕對有助大幅度減少內地水貨客嘅活動。」他又稱「一周一行」可攤分香港接待能力：「一周一行嘅話呢，其實你係將啲人分流到去一年52個禮拜，咁咪對我地嘅接待能力大大提升。」
譚凱邦：應完全取消一簽多行
對於「一簽多行」將改為「一周一行」，人口政策關注組發言人譚凱邦：「都係一個好開始，但絕不能係停喺依一步，我覺得係要進一步收緊，而我哋一直提倡嘅立場，就係要取消一簽多行，因為係咁嘅情況下先可以回復返去到2009（年）嘅水平。」
梁耀霖：一周一行影響即日來回旅客
香港入境旅遊接待協會主席梁耀霖表示，「一周一行」會嚴重影響經常來港消費的深圳高檔旅客，因為現時每天都有這些人來港到名店掃貨及到豪華食肆用膳，並在晚上返回深圳。
范國威：一周一行成效不彰
新民主同盟立法會議員范國威表示，「一周一行」成效不彰，只是內地對水貨問題形式上的回應：「佢哋（內地人）有啲唔係水貨客，係星期六、日過來買日用品，一個星期來一次對佢哋無影響架，咪買多啲番去囉！」
北區水貨客關注組：仍持「一簽多行」可繼續走水貨
北區水貨客關注組發言人梁金成稱，「一周一行」只限制新申請者，即持一簽多行的內地人可繼續從事水貨活動，完全無助解決有關問題。
