【新聞評論習作】——-怪論
從甲/乙兩則新聞報導選材寫怪論一篇，一為統計處最新統計數字，一為有研究人員非法從事人體實驗……..
….
陳生，你好，我係「樓股齊升」地產公司嘅經紀阿Joe，小姓楊，今日係想同你sell個超抵窮人恩物，誠哥旗下緻X天，嗱，真係超筍價！實用面積430呎連工人房都係賣800萬咋，抵到爛！
咩話？你唔夠人工供樓？唔緊要！我地公司為咗更貼心咁服務顧客，特別推出呢個「甲子供樓」方案，唔係甲子園，唔係和平鴿，而係「一個甲子」—分六十年嚟供！人地外面重做緊三十年，每個月要供成萬五六蚊，你JOIN我地呢個plan，平一半，每個月供六七千蚊，唔使好似報紙啲人成日話，一係一日剩係食兩餐麵包，或者問老豆老母借幾百萬嚟買樓，抵諗呀！
吓？你驚自己冇咁長命？唔會㗎，香港人精神係咩？就係打不死嘛！你今年重要啱啱21歲出嚟做嘢，呢個供60年plan啱晒你。你冇睇新聞咩？而家香港人預期壽命男人81歲、女人86歲，咁長命，當然攞嚟供樓啦！講真，唔係要咁長命嚟做咩？如果你供供吓中途，生癌生嘢肺水腫，或者太大壓力跳樓死咗，都唔緊要，你買咗樓，留俾後代都係一份心意，唔係一份負擔，俾你啲仔仔女女繼續幫你供，起碼有舊磚頭嘛。
同埋呀，三十年後你一個人要養社會上面一點二個人，他日政府使到啲錢所剩無幾，你重可以每個月有多幾錢蚊，嚟供社會上面其他細路讀書、老人家買生果，甚至乎倒貼俾政府起第五六七條跑道，到時你重唔係英雄？
跟Joe Yeung，冇遭殃。我唔會點條死路俾你行嘅。
北水源源不絕，股市牛氣沖天，樓價屢屢破頂，漸成神話，仿似連加息都唔怕，總之長升長有，阿Joe又有嘢講「你班八九十後等跌市先上車？你傻㗎？唔會跌㗎！你而家唔上車，第日連劏房同走廊工人房都冇得你住呀！」
作者：陳伽泓
