新聞敢批 2014-02-07
步步高升?!
主持:蘇樂恩
—
【文字版】步步高升?!
喺過咗嘅農曆新年，你有無祝身邊嘅親戚朋友步步高升呢？喺我哋希望人工、成績蒸蒸日上嘅同時，唔知你又有無發現，原來唔少食肆已經搶閘加價：除咗麥當勞由前日起加價百分之2.2，其他嘅大型連鎖食肆例如大家樂、美心、吉野家等等，都喺呢兩個月提升唔同食品嘅價格，增幅大概百分之一至二。
除咗大型連鎖食肆，原來我哋身邊一啲小食店都唔例外，紛紛加價。經濟日報就報導，喺旺角砵蘭街嘅一間小食店，佢哋嘅魚蛋一碗由30蚊加到40蚊，究竟係因為店主想一發新年財，定係營運成本實在加得太多太快，就真係不得而知啦。
面對不斷上漲嘅食品價格，恒生管理學院商學院院長蘇偉文認為，定價的合理性完全由市場決定。仲話，既然魚蛋40蚊一碗都有人買，就證明佢有一定市場價值。雖然我哋明白，面對成本上升，食肆加價在所難免，但係百物騰貴，香港嘅普羅大眾究竟係樂意接受定係逆來順受呢？相信大家心中有數。
撰文: 蘇樂恩
