獨立調查委員會不可或缺
市民（#A52）：「三個月後，經過大大小小的衝突，特首終於宣布《逃犯條例》由壽終正寢變回撤回。但係已經無法彌補呢3個月發生的事情。我認同香港警察係需要維持秩序，咁在元朗、北角，拎住武器非法集結的人，打記者，打市民，點解警察唔即場拘捕佢地，仲護送佢地走呢？我認同犯法的人係需要被法律制裁，但係香港警察濫捕，使用過分武力去攻擊市民，侵犯佢地的自由同人身安全，警察犯錯，市民就只能去投訴警察科投訴，然後就等無法定調查權力的監警會去睇翻調查報告，我想問特首你係咪寧願維護3萬名警察，都唔想成立獨立調查委員會呢？」
市民（#B47）：「好想知道政府係有咩原因去拒絕成立獨立調查委員會，回歸後已經過5次獨立調查委員會，並唔係因為冇機制去審查，而是事件對公眾利益有好重大的關係，難道「送中」唔係重大事件嗎？點解唔可以去實施呢？係咪仍然冇考慮呢？」
市民（#B32）：「政府一直都話監警會已經足夠去調查警隊內部嘅問題，就唔需要成立一個獨立調查委員會嘅。其實監警會成立至今都已經有一段好長嘅時間，修例風波都將近數個月，要去到咩程度，政府同警隊先會承認監警會係失敗，係幫唔到香港人申冤？先會成立一個獨立調查委員會？同埋佢（獨立調查委員會）嘅透明度都係大家想知道嘅。」
市民（#C25）：「香港曾經係以治安好而聞名嘅，其實唔單止警隊努力，香港勝在有ICAC，宜家香港亂象就係缺少一個可以制衡警隊濫權嘅機構，唔好同我講監警會同現行機制，諗下當年點解要成立ICAC先。宜家市民對警方嘅唔信任已經去到831一路傳警方打死人，警方話冇，都冇人信。既然有CCTV可以做證據，警方係咪可以主動去調查呢？就算冇人報案，係咪都可以主動去調查呢？」
市民：（#B44）：「大家最關注都係成立獨立調查委員會呢個問題，頭先你自己都話獨立調查委員會都係其中嘅方法之一，其實都過咗3個月啦，監警會都做唔到啲咩實質行動，點解你唔可以兩樣一齊做呢？你話去到幾個月之後監警會先睇嗮721、831發生咗啲咩事，咁如果你到時真係發覺原來警察真係捉錯人嘅，咁宜家警察冇number冇盛，你要點解決呢個問題？」
市民（#C42）：「除此之外，呢3個月發生咗咁多事，係好需要成立一個獨立調查委員會。而呢個獨立調查委員會，針對嘅對象係咩？我建議委任退休法官，同埋社會人士，調查今次暴動背後嘅原因，如果有議員參與，全部應該停職調查。當然，有警察做得唔合理嘅地方，亦都需要去調查，但係並非淨係針對警察。」
一國兩制是否變質？
市民（#C25）：「其實本人好認同「一國兩制」，唔使多唔使少，跟翻足落實基本法去做已經夠了。最後，宜家香港係身處黑暗嘅，好需要光復香港，我地全部人都盡嗮力啦，咁你地呢？香港人加油。」
市民（#A27）：「我希望你地落實咁樣做一國兩制，係真係當時講嘅一國兩制，河水不犯井水，而唔係變咗質，將上面（中國）嘅制度慢慢攞落來，你地不停咁樣將條線推後，我地已經去到退無可退了。」
市民（#A03）：「一國兩制我知邊個破壞緊嘅，絕對唔係『港獨』，『港獨』只不過係假想敵來嘅啫，我支持香港行一國兩制，同香港自治嘅。」
市民（#C13）：「（林鄭）你頭先提到啦，香港人自治係唔可能嘅，但係我由細聽到大嘅係『港人治港，高度自治』，我係九七年出世嘅，由幼稚園聽到最近，佢唔見咗，唔知去咗邊。一國兩制係好嘅，但我希望你明白香港呢個咁特殊嘅地位唔單止係中國俾嘅。點解叫國際城市呢？係因爲其他國家都相信香港嘅法治香港嘅地位。」
特首Disconnect，社區對話誠意不足
市民（#A27）：「我覺得你對大家唔係一視同仁咯，你淨係爭取政商界嘅支持，你覺得你數都票，可以過，你就覺得唔需要聽我地講野，直至到你覺得唔係窩，個社會氣氛好過分窩，可能你已經承受唔到了喔，你先至慢慢一步一步咁落來同我地對話，但係你知唔知你上一次講嗰班人係no stake in society，係幾hurt大家啊？如果你真係想知道大家嘅民意嘅時候，你願唔願意公投啊？你可以俾大家去公投，我都唔敢講我代表幾多人，但係你願意俾人公投嘅時候，你咪聽到市民嘅聲音咯。」
市民（#A57）：「啱先林太都講到好清楚自己同香港人係disconnect嘅，既然係咁，你每一次都係好口號式咁講，但冇真正實際咁去做，點解你唔直接落區？宜家喺伊館出面已經有好多示威者想表達佢地意見，亦都講緊佢地嘅口號，點解你唔直接同示威者接觸？而只是抽150位人士淨係講3分鐘呢？林太，點解之前你寧願去探八達通機，你點解唔去新屋嶺探被捕人士，唔去探721、831受傷嘅市民呢？我係覺得呢件事係講唔通嘅。」
市民（#B39）：「特首對我地嘅回應就好似『我有我講，你有你做』。就好似一個行山論咁樣，政府同市民一齊去行山，政府一直帶喔地去行，但係又一直迷路，又行錯路，瀨嗮嘢咁樣。直到去到一個分岔路嘅時候，市民同你講我要用呢種方法去行，政府依然都係話我要你跟我呢一套。呢個就係我今日嘅感覺。」
市民（#A43）：「林太，你話對話可以戰勝衝突，我諗你已經錯過咗一個最好嘅對話時機，我相信今日都係一場政治show。」
政府警隊失信 制度行之無效
市民（#C25）：「721嗰度一早其實有議員已經收到消息，《鏗鏘集》亦都影到警察去睇過係有白衣人聚集嘅。但係最後都係出事啦，39分鐘之後都係未有警員到場，既然有咁充足嘅時間準備，點解咁嘅情況下都冇警員到場，令到大量市民受傷呢？如果唔係故意製造無警時分，即係失誤，咁會唔會有負責決策嘅人去負責任？同埋佢會有咩後果呢？」
市民(#B32)：「好多人都會對新屋嶺有一個疑問，新聞都有報導過，其實之前有議員同太平紳士想申請入去，觀察入面嘅情況。香港人對於入面發生嘅事係一無所知，都係睇報導，但報導可能係單方面嘅，我地接收嘅資訊都好少，其實政府係咪可以公開少少透明度，俾我地知道示威者喺入面係咩情況呢？因為宜家可以話係有少少死無對證嘅現象出現咗。」
市民（#B39）：「至於你所講嘅監警會，其實普遍市民包括我聽到嘅聲音，都係『行之無效』。既然有人話香港電台收政府嘅錢要幫政府講嘢嘅話，咁呢個電台係咪有問題呢？如果佢只係報道真相，都俾人話有問題嘅話，其實佢嘅功能係唔啱嘅，係咪應該要解散？居然有人咁講嘢：『收政府錢，唔係幫政府講嘢』呢個係公義嘅問題，如果咁嘅話，一個冇辦法執行職務嘅警隊，係咪都係要解散？」
市民（#A58）：「由6月到宜家其實政府係咪真係有心解決呢個問題呢？見到好多嘅位係，警察成爲咗政治嘅工具，因爲宜家係冇一個有效嘅機制去監察警方濫權，所以變到不單止市民甚至警察嘅家屬都好擔心自己嘅安全。監警會做緊嘅嘢就唔係調查，只係搜集資料，佢地只係做緊一啲專題報告，係冇約束力架。佢只係俾警方建議，警方可以選擇聽定唔聽。」
市民（#C38）：「宜家個問責制係咪已經壽終正寢？」
市民所憂 何止政治？
市民（#C18）：「我記得港珠澳原本話係一個機遇，係大灣區俾一部分香港做嘅。但係宜家社會呢個咁嘅情況，亦都睇唔到我地香港仲有一啲機遇去俾香港做一啲經濟發展嘅嘢，大灣區呢個機遇我真係睇唔到。」
市民（#C42）：「新聞處，稱第四權嘅媒體，假記者氾濫，甚至嚴重影響執法，協助逃犯，抹黑政府同執法部門，為禍人間，政府應該嚴厲監管記者發牌同埋操守，尤其係香港電台，出政府糧，反政府，應該由內向外完全重整，官方頻道應該做翻佢應該做嘅嘢。」
市民（#B22）：「我唔知點樣將我地嘅香港交俾下一代，我好驚。點解呢？社會分化好緊要，每個禮拜我都好驚出去，唔知邊度會又斬人，唔知邊度會打人咁樣。我同我屋企人，老婆小朋友都好驚。政府可唔可以幫到我呢？」
市民（#A57）：「催淚彈嘅殘餘物係影響緊成個社會。橡膠彈、海綿彈甚至係宜家出緊嘅水炮車威力都好大，係影響緊成個社會，令好多人都好驚到底仲可唔可以出街，出街都要諗要帶啲人去邊度呢？尤其有小朋友嘅話。催淚彈嘅煙可能會影響成個社區，尤其係小朋友無辜吸咗，同小動物吸咗都係有影響，究竟有咩措施可以去改善社區，令殘餘物唔好留喺個社會度呢？」
市民（#C17）：「兩大訴求，第一係同房屋有關，相信大部分香港市民都覺得香港屋太貴啦。如果明日大嶼係一個好具爭議性嘅提議，會唔會考慮近岸嘅填海？冇咁貴。同埋盡量去收地，因爲真係好多市民需要屋嘅，起多啲公屋。但係我唔希望政府因爲今次嘅紛爭將資源傾斜去某個年齡層嘅人或者係單身人士。因為有家庭嘅人係更加需要公屋嘅。教育方面，其實每一個人都應該要知道自己國家嘅歷史，咁我係希望恢復中史嘅教育嘅。」
年輕人聲嘶力竭的呐喊
市民（#B02）：「我係一個中六嘅年輕人，林鄭你講得啱，我唔明政治。我唔明政治點解係一種遊戯，而我地市民只係用來犧牲嘅工具。作爲香港嘅慈母，啲人上街吸催淚彈嘅辛苦你有冇體會過？我地年輕人俾子彈打，俾警棍打，你有冇同情過我地？親生父母見住仔女被捕，佢地嘅痛哭你有冇憐憫過佢地？9名義士白白犧牲性命，你有冇理會過？呢啲先係值得關心嘅民生，而唔係一部爛咗嘅入閘機。」
