電視發牌膠劇仲未播完，無記就趕唔切同壹仔合力推新劇。戲碼唔用木偶怡同馬明，改由兩位「片商」高層飾演，難怪收視率仲低過29點，不是他們不夠靚仔，只係成套劇無論劇情定金句都淨係圍繞「新聞自由」一條線，悶之餘，連兩大主角都唔知咩叫新聞自由，仲要互搶戲份，白痴對白痴，觀眾連邊個正，邊個邪都分唔到，好心倉底貨就收番埋喇。
依套劇主要承接住之前部「發牌膠劇」。港視無牌玩，主角之一的壹仔就例牌做反對派，鬧班綠豆官之餘，連「拍檔」無記都話埋。連續幾日頭版叫人熄機，仲叫班廣告商咪睬無記。到被封殺，就話自己新聞自由被踐踏。
唔好淨係話師奶無知，好多新聞中人都不知新聞自由為何物。新聞自由代表人民擁有自由發表言論，同時新聞界擁有採訪、報道、出版的自由。壹仔不是不明白，
佢一直希望做場好戲，但次次都演得太誇，走火入魔。有唔少人批評過佢浮誇，不過佢好少理，仲反駁誇張都係個性，係我自由。不過，自由放大變相就令演技失真，叫人點信你呢!難怪壹仔一直都做唔到影帝。
另一邊的無記，明明生日，都俾壹仔搶風頭，自然心有不甘，一招反客為主，連卿姐派帖請飲茶都唔俾壹仔黎，仲講明飯局實無份。唉，壹仔玩極都係落你面，無記就玩盡全港觀眾，連觀眾獲取資訊的自由權利都剝奪，更枉論新聞自由。爭戲做爭到連觀眾都出賣，仲擺出一副逼於無奈樣。第一膠劇製造商之名當之無愧。
膠劇上演兩星期多，兩位白痴主角不知仲要將套劇推到幾時先完，不過肯定結局唔會再係BBQ happy ending。
陳君沛
評語：充滿時下香港膠文化氣息，全文針對兩位主角「批評過佢浮誇」，「好多新聞中人都不知新聞自由為何物」值得媒體反思！
