【堂上練習/萬聖節】我係一隻愛國鬼，生前最愛藍絲帶。今日十月三十一日，外國勢力抬頭，漢奸佔領蘭桂坊，個個掛住食自己、霸住晒啲路，一啖泥都唔畀我食，個個都自私鬼！呢個都唔知係咩洋鬼子節日，個個扮鬼扮馬，嘈喧巴閉，開嘉年華咁，完全無尊重過我哋呢班老屎X，叫人點瞓覺，我身邊個賓賓就好似話係因為「佔中」，瞓瞓下俾個櫃壓死，真無陰公。
我們偉大既祖國咪就已經有七月十四盂蘭節囉，嘢食要幾多有幾多，源源不絕，所有人都提早返屋企，唔會阻頭阻勢，樂得耳根清淨。真唔明點解近幾年，好少見到呢日會有後生仔出嚟攞米、睇神功戲，佢哋有冇諗過冇我哋前人種落既福，而家會有得享？佢哋識唔識飲水思源？一個二個投靠晒外國，你哋究竟知唔知洋鬼子有好多陰謀，之前就話人哋有殺傷力武器，實質就係想要人哋啲石油，佢哋就係驚我哋偉大祖國經濟崛起，想分化我哋中港關係咋，懵炳！
民主自由就係好喇咩？我哋都係七月十四先喺鬼門關出嚟一次啦，咪又係生活得好地地，食得飽又唔亂。你睇泰國嗰邊，咪就係民主得滯，搞到立立亂囉。唔係樣樣嘢都度度啱用嘅，唔好咁貪心啦年青人。傘可以攝鬼，你哋唔係就以為一人一把黃傘子就可以收我哋皮吓話，你得嗰幾十萬人，點同十幾億人鬥呀？藍絲帶萬歲！
撰文：謝家淇、趙潤生
