新聞敢批 2013 12 18
又唔好意思囉
主持:許貫林
—
【文字版】又唔好意思囉
前排將軍澳線供電系統故障，癱瘓5個幾小時，運輸及房屋局局長張炳良就話或者要罰港鐵750萬，而家一於同大家計計數。
750萬(7500000)呢個數字睇落好大，但係同港鐵2012年公佈既整體營業額357億(35700000000)比，真係九牛一毛啦，淨係計本地鐵路收入145億(14500000000)，都只係百分之0.05，以佢接近一半毛利率去計，只要半日就賺到返黎啦。
2012年可加可減機制調整時候，就引入罰款機制，事故罰款撥入回程九折基金，但係睇返年報，每程大概八蚊計算，搭兩程加埋十六蚊，仲要淨賺一半八個幾之後，先比返九毫子乘客，真係多謝哂嘞。
睇返舊有報道，2012年第一年行回程九折，本來要派6億，點知派咗半年先得4成，規則又複雜，再將罰款加落去又係咪有用呢？
750萬，佔港鐵業績只係咁少，究竟呢個機制仲有無用呢？計我話，而家票務系統咁先進，受影響乘客送返兩程車，真係要港鐵蝕到入肉先夠咗阻嚇性。
撰文:許貫林
—
