無綫在節目《東張西望》，力撐政府不發牌予香港電視，激起過萬觀眾投訴壹傳媒出動旗下《蘋果日報》及動新聞乘勢狙擊，更煽動觀眾「熄機」罷看無綫。無綫氣難下，以「封殺」回敬。「視霸」與「報霸 」之戰展開。
心水清的話，便知道無綫出動「封殺令」有前科。三年前，無綫與四大唱片公司因版稅問題鬧翻，傾唔掂數，無綫實行唔同你傾，於是下達「封殺令」，禁止四大旗下歌手出席電視台節目，又取消四大歌手的「勁歌」參賽資格。
四大歌手就慘，見光率大減，收入跟住一齊減；不過無綫都唔好得幾多，只能靠一班「超級巨聲」，充斥場面，節目叫座力大不如前；做觀眾，更慘，因為無野好睇。事件去到最後，原來無人得益。
事隔幾年，最近好像傾掂數，無綫對四大歌手重開綠燈。但樂壇變成點？大家有眼睇。叫得出名的歌手，還有幾多個？唔好意思，我只係識容祖兒。
話就話前事不計，重頭來過，但大家都知道，已對本地樂壇，造成「永久性傷害」。大家都是娛樂事業龍頭，又何必搞到兩敗俱傷。
講返今次呢單，無綫封殺壹傳媒，經常都話，香港彈丸之地，能容納這麼多傳媒，可以說是奇蹟。而正正是這個多樣性，讓社會上不同意見有渠道發聲，對香港來說， 實屬難能可貴。
「視霸」撼「報霸」，你狙擊我，我封殺你， 冤冤相報又何時了呢？最後邊個係驘家無人知，但輸家，就一定係市民大眾啦。
楊皓然
評語：有前科的論據有說服力，說出三輸局面，但「永久性傷害」應具體舉例說明。全文言簡意賅，但略欠怪論的幽默、諷刺。
