新聞敢批 2014-05-16
一週新聞回顧
主持: 黃子健、陳景瑤
___
[文字稿]一週新聞回顧
子健，你睇吓，我今日隻錶靚唔靚？
真係好靚啊，你睇你睇，我從來都未見過咁靚嘅錶架。
嘩，咩你講大話啲戲咁浮誇嘅，細路仔都唔信你啦。
咩啊，我呢招係向運輸及房屋局局長張炳良學返黎架。
吓？佢做局長做到戲劇都有興趣？
緊係啦！明明一年前已經知高鐵延工，上個月聽到嘅時候又可以表示驚訝及意外。
片 :[喜劇之王：根據俄國戲劇理論大師史坦尼斯拉夫斯基的說法呢。應該係由外到內，再由內去返外的. ]
佢話當時政府同港鐵係延誤問題有分歧，所以要「疑中留情」，唔公佈係要「包容雙方立場」喎。
嘩, 玩文字遊戲?
係呀。你話如果老師對我哋啲功課deadline都可以「疑中留情」,sem尾咪唔駛咁辛苦囉。
吓？夾硬左啲喎。
咁呀，又或者好似香港高鐵站b4層咁，明明今時今日仲有大量花崗岩未處理，上年就可以話已經做到b4層，開張空頭支票過骨先。
空頭支票唔夠嘅話，或者試吓賴地軟吖。
吓？賴地軟？唔係賴地硬咩？
而家興創新字呀，港鐵原來唔止搞唔掂高鐵，而家連南港島線都有事呀，話土質太軟，所以要改變鑽挖方法，工程又「滯後」喇。
連埋沙中線挖吓挖吓又揾到文物，地鐵究竟有邊條線有得準時交貨架？
冇計啦，人哋話，高鐵事件已顯示港鐵工程團隊太自信吖嘛 做人都係謙虛啲好。
謙虛啲學林鄭咁講句：畀條路嚟行吓得唔得，咁咪大方得體又有效囉。
係咪真係有效架？如果講句嘢就得，財爺同長毛講句（片：財爺 ：行開啦）點解又剪唔到布？
傻嘅，剪唔剪布，係曾鈺成決定嘛，財爺講乜都冇用架。
咁又係喎。吖，不過立法會主席曾鈺成好似又話想建議修改議事規則，將剪布權力交返畀議會喎，推個波畀人，唔駛做醜人，咁先醒呀／
哈，不過，你精我都唔笨喎，立法會議事規則委員會主席譚耀宗話好憂慮喎，驚到時泛民議員因為政治原因唔敢剪布，拉布就沒完沒了。
都係拋返個波畀主席安全啲，佢最醒嘞。
如果我份功課都可以拋嚟拋去唔駛做就好喇。
好學唔學，聽長毛講（片：長毛：開工喇）快啲開始好過啦！
撰稿: 黃子健、陳景瑤
