新聞敢批 2014-04-30
一週新聞回顧 (21/4-28/4)
主持: 黃子健、陳景瑤
___
[文字稿]一週新聞回顧 (21/4-28/4)
咦咦，景瑤呢？
對唔住呀，遲咗咁耐。
做咩呀，遲咗起身呀？
唔係呀，塞車呀，地鐵好多人，等咗好多班車呀。
哦！係喎， 運輸署都話呢幾年遊客出行高峯轉左，喺繁忙時間同香港人爭車搭，咁你以後早啲出門口喇。
唉！冇啦，幾早起身都冇用，前幾日去咗廈門玩，今朝先返嚟，搭高鐵淨係去到深圳，再轉地鐵返嚟有排搭，點知東鐵就故障，你話係咪激死人？
唉！冇計啦，地鐵成日壞就係人都知，點知香港高鐵又咁耐都未起好，又話2015年完工，而家又要等到17年，仲要貴咗148億。
港鐵話係因為之前黑雨搞到停電嘛。呢啲係意外嚟嘅，冇辦法啦。
吓？唔係喎，中電明明話冇停過電喎，其實黑雨之前已經延誤咗至少四個月，我哋俾人呃咗喇。
搭地鐵要等 ，搭高鐵要等，係咁架喇，你唔好怨咁多喇，有得比你返到嚟香港咪好囉。
我又唔係喺大學宿舍種大麻，點會返唔到香港？
做咩咁都要抽人哋水?! 我講緊流亡美國的民運人士楊建利呀，被入境處扣查近四小時後遣返台灣。六年內四次畀人拒絕入境。都唔知等到幾時先闖關成功。
我諗耐唔過普選，都耐過公屋，承諾左咗三年，點知有啲人要等八年。
八年濕濕碎啦，政府搬大樓都要等，灣仔三幢大樓話搬，搬咗六年都未郁過，仲話要等多七年先得呀，加埋就十三年喇。
等下就有轉機嫁喇，好似狼特首咁，要我哋等夠三年零八個月，最後先促成咗菲律賓嘅道歉。
希望特首可以繼續佢嘅能力，幫埋南丫海難家屬，等佢哋可以早日睇到等咗年半嘅報告啦。
等等等, 分分鐘等到iphone有中文譯名，你都未有報告睇。
點解Iphone要有中文呀？個i字點譯呀？
唔知呀，人民日報話，成日用外文會影響漢字結構喎。
咁聽落又幾啱，入鄉隨俗係禮貌吖嘛。
如果個個都係咁諗呀，就唔會有小朋友當街大便，搞到而家滿城風雨啦。
蘇錦樑話，包容係最好嘅方法。環球時報都話啦：不包容就是集體不文明。其實我哋忍吓就冇事啦。
仲忍! 我忍唔住喇……
吓？你去邊呀？
廁所呀！
撰稿: 黃子健、陳景瑤
