新聞敢批 2014-03-27
一週新聞回顧 (17/3-24/3)
主持: 黃子健 陳景瑤
____
[文字稿]一週新聞回顧 (17/3-24/3)
景瑤點算啊! 點算啊! 我哋一哥畀人打啊!
吓!襲警要坐監喎!
係囉…佢仲要係比保安局局長打添啊。
吓？幾時呀？
嗱，一哥咪話劉進圖事件同新聞自由冇關嘅，但局長出席立法會保安事務委員會嗰陣講咩吖？
哦！局長話事件唔排除同新聞工作有關，一哥話冇關，局長就話有。
陳家洛咪串佢好似摑咗一哥一巴咁囉！
哦！原來講呢樣，你咪講啲唔講啲啦。
咁就算唔係真係打咗，都對保安局形象打擊好大喎。
兩個人都係保安局入面嘅高層，有咩理由自打嘴巴嫁?
唉，一哥今次一句沒證據顯示與新聞工作有關就畀人講咗咁耐，真係禍從口出啊!
不過禍從口出嘅又唔只一哥一個喎，仲有「一鎚定音」嘅林鄭喎!
係啊，佢呢一鎚就真係打得響喇，說話一出街，即刻比人講完又講。
最弊佢打錯位呢，仲要比人話佢代表政府為政改諮詢「落閘」啊!
嗱嗱嗱，你又唔駛咁驚，我哋政府不嬲都講過唔算數架，林鄭話落閘唔代表689落閘架。
咦，係喎，689話香港人同內地人都可以繼續畀意見喎。
吓，香港政改唔係等香港人自己傾咩？唔通真係西環治港？
傻啦，邊個話有港人治港架？喺香港唔識講普通話分分鐘冇飯食添呀。
咁又唔好咁誇張，只不過港大食堂收銀員唔識聽廣東話啫，唔駛無限上崗嘅。
學十郎話齋，吖唔係，係巴斯光年話呀，你嚟到香港，我冇必要同你講普通話，人哋喺中央台都照撐廣東話呀。
但巴斯光年唔係講English咩
吓?!
撰稿: 黃子健 陳景瑤
