新聞敢批 2014-03-31
一週新聞回顧 (24/3-31/3)
主持: 黃子健 陳景瑤
___
[文字版]一週新聞回顧 (24/3-31/3)
天降異象啊，今次大件事喇。
子健，你做咩一早就喺到亂講嘢啊?
我唔係亂講嫁，啱啱嗰個星期日香港落雹啊!
我知，仲打穿咗又一城個天花，搞到水浸添! 啲人話係商場特備節目「水舞間」喎。
唔只呀，屯門啦沙田啦都有商場天花爛咗，又有幾個港鐵站水浸，仲有列車比雹打穿咗添啊!
哈，港鐡呢招叫掠水呀。見水浸就話要錢維修，講句唔好意思，咪又可以加價囉。
咦！係喎。景瑤你見人哋掠水，你就嚟抽水，都係你最威水。
無聊。不過，唉…天氣咁惡劣，唔知嗰十七個輪流絕食嘅民主派議員點算，希望佢哋識搵地方避一避，唔使受風吹雨打喇。
但係滙豐又將總行出入口大閘落咗，又貼告示恫嚇話不排除採取法律行動，仲通宵喺電視牆大聲播七人欖球賽宣傳片添。
民主派議員如果繼續留守就真係好難挨喇。 不如我哋買啲外賣探吓佢哋，等未輪到嘅議員食吓，幫佢哋打吓氣吖!
買咩鬼啊，連喺香港做咗三十九年嘅十三座牛雜都因為租金太貴執咗笠喇。
係喎… 唉，旺角信和啲明星相鋪咪又係交唔起租而執笠？老字號都捱唔住喇。
賣明星相? 吓? 香港人仲捧香港藝人咩? 我仲以為個個都淨係識得睇星星添。
咁你又唔好咁講，香港仲有好多好有才華嘅人架，你以為個個都係天堂鳥咩!!
天堂鳥?你係咪講最近新出道嗰隊三人男子組合？
係呀，咪就係受盡網民嘲笑嗰隊囉。
哦，不過呢，聽講呢隊組合嘅經理人公司有中資背景，今次一定紅得起喇！
有中資背景就紅咩？又喺度亂噏，唔通三月落雹就等於六月飛霜有冤情咩？！
有可能架，你知唔知26年嚟香港淨係試過3次3月落雹，而最近嗰次就係舊年3月 之後就係今年3月…
咦，689好似2012年7月上台，之後就連續兩年3月落雹……
唔通…
撰稿: 黃子健 陳景瑤
