【教學隨筆】一個「宋大姐」集結「老總房」以經驗啓發學子之欄目。
周五上四年級評論堂，講港式特色評論—-怪論
請同學以通俗的「三及第」文體撰寫針砭時弊的「怪論」
這類評論文屬正言若反的雜文，內容諷刺幽默……. 不容易
請同學即日練習………….
堂上提供資料要同學由台灣相思樹談到本土問題………………
甲、台灣相思與本土運動 (林卓澔)
台灣相思在香港隨處可見。表面上在香港各處茂盛生長，卻不利本土生物發展。政府卒之搞個《郊野公園植林優化計劃》，入面就話：「引入更多本土樹木品種，藉此提高植林區的生態價值和生物多樣性，並為本地野生動物提供更適合的棲所與食物。一些外地品種樹木、生長過密、老弱及枯死的樹木會被移除，以優化郊野公園植林區。」政府帶頭於環保政策大搞「本土」，未知其他政策會唔會惠及本土先呢？
提起香港獨立，「本土」一詞便如影隨形，兩者劃成等號，仿佛提起「本土」便等同港獨。不過政府現今似乎明白，講本土又好似唔等同港獨，否則邊敢在《郊野公園植林優化計劃》大談「本土」？一直以嚟，大講咩嘢本土優先，香港獨立都不過係一班無所事事，活喺象牙塔嘅一班「港青」同「本土中產」，政府何不打蛇隨棍上，先塞住佢地把口，推而廣之，大搞「本土運動」？
所謂「本土運動」，亦只不過係市民討回自己公道啫！只要樓市本土化：人人有屋住，後生仔上車難度減低；醫療本土化：優先處理港人孕婦；產業本土化：投放資源比本港新興產業。上行下效，到時仲邊駛DQ嗰班本土派議員，政府索性擔當埋本土派角色，香港市民得到甜頭，仲邊會得閒上街示威，同你和理非非、佔領中環得㗎。
本土笑匠周星馳喺《蘇乞兒》入面飾演乞兒皇帝，佢同真正皇帝嘅一番對答如下：「如果你（皇帝）真係英明神武，做到國泰民安，搵鬼得閒做乞兒咩。」如果政府真係惠及本土，仲邊有人得閒同你講「港獨」吖。
總評：立論/主旨清晰，有觀點，推論合情合理………..佳。
乙、根與土 (陳瑤)
樹、根、土三者係緊緊相扣。樹根為樹木吸收泥土養分，同時肩負支撐整棵植物嘅重任。即使遇上暴風雨，樹葉同樹枝吹到歪晒，根部仍然抵抗惡劣環境，努力支撐樹幹。然而，話就話「根越努力，樹就越茂盛」，但係無泥土，樹一樣生存唔到。若港人守護本土失敗，香港嘅前景就會變得黯淡。
樹根為大樹爭取泥土養分，等於港人爭取本土民主，捍衛香港核心精神咁。其實「本土意識」由七、八十年代萌生，當時香港經濟急速發展，港人對社會歸屬感強咗，覺得自己「與眾不同」。惟過去十年，天星碼頭、皇后碼頭被拆卸等等事件，反映港府、地產商同「中環價值」破壞緊令港人有歸屬感嘅嘢。再者，內地同胞侵佔香港、北京成為香港實行「一國兩制」嘅最大阻礙、阿爺搞到港人嘅普選訴求如同天荒夜談等等因素，就似掟石落屎坑——激起公憤，唔怪得市民會有反中共對港統治嘅心㗎喎。中港政府搞到香港立立亂，民主同自治空間受壓，真係謝主隆恩！
樹根抓實泥土，除咗吸收養分，都係為咗令棵樹穩定生長。2014年雨傘運動，確確實實激起本土思潮，令到班政治冷感嘅後生仔討論本土政情，亦有好多人上街爭取民主自由。見到港人咁踴躍守護自己生長嘅地方，抱緊香港本土價值，係件值得紀念嘅事。但係從嗰時開始，港人對本土意識嘅定義就唔同咗，由覺得自己「比人優秀」變成真正嘅「排他」，同時意味著中港雙方已經「無偈傾」。想社會未來向好，自己香港自己救係應該嘅，但用咩方法就有待商榷喇。
雨運嘅「餘震」到宜家都未散，某啲激進嘅後生仔打著「本土」旗號，將本土精神用做新生代公民抗命武器，視國民身分為糞土。據港大最新民研顯示，18 至 29 歲本地青年自稱純粹「香港人」嘅比率為69.7%，係回歸後有史以來最高；而自稱純粹「中國人」嘅得0.3%，紀錄創新低！2015年世界杯外圍賽，有本地球迷噓國歌同擺出“Hong Kong is Not China”標語；在遊行中，亦有不少本土青年呼籲支持「港獨」。其實對國情稍微有認知嘅人，都好清楚我地無可能擺脫「香港係中國一部分」嘅宿命。提倡本土精神無問題，但嘥力去提倡港獨，有乜為呢？連《華爾街日報》都曾經在臉書引用一篇有關「中國是香港的母親」貼文，最重要係，唔聽呀媽話，下場有排受呀！
港人（尤其新一代）大力擁護本土精神，可見我地嘅社會仲有希望，但香港屬於中國呢個事實無得變。雖然宜家大部分港人覺得比內地人優越，雙方仍然應該用理性嘅態度互相磨合，尊重大家嘅共同利益。如果港人肯認中港係「命運共同體」嘅話，香港的本土意識反而利於「一國兩制」嘅進程同機遇，兩地雙雙進步。《枯樹賦》有句話係：「此樹婆娑，生意盡矣。」計我話，宜家嘅香港應該係「此土民擁，機無盡也。」喇！
總評：立論/主旨清晰，有觀點，擺事實、講道理，內容有說服力………..佳。
行文略欠怪論的嬉笑怒罵、正言若反
丙、相思雙思 (李卓謙)
位於中國南邊，某個一直由中國擁有主權嘅城市。近年推行「樹木更替優化計劃」，話要引入更多「本土樹木品種」。一班台灣相思係到住足幾十年，為人遮風擋雨，真真正正「落地生根」，聽到呢個消息都感慨人情冷暖，以下為他們的對話：
相思樹甲：唉，我係呢到都住左幾十年，一直都相安無事，而家見我哋老啦，就嫌我哋會枯萎、倒塌，以後唔要我哋啦！
相思樹乙：甲叔，所以話你啲老人家，都唔化嘅，人哋話呀，而家時代演變，資訊又發達，所以要與時並進，精益求精，不斷提升質素，切合需要。我哋呢啲台灣相思，改個名又政治不正確，過氣啦！
相思樹甲：乙仔，說話唔係咁講呀。當年打完仗，呢到人見山邊光禿禿，先話要我哋呢啲台灣相思移居過嚟姐。講真丫，住咗係到幾十年，仲叫咩台灣相思丫，我都唔記得自己有冇係台灣住過，連台灣係咩樣我都唔記得呀！係邊到品種，重要咩？
相思樹乙：冇計啦，而家「阿爺」收返呢到，我哋認命吧啦！
相思樹甲：嘿嘿，乙仔，你講「收返」，因住人地聽到又話你「政治不正確」呀！嗱講真，我呢啲老人家，都嗰頭近啦，就算要搞我哋，要斬要殺都冇所謂，反而你哋仲後生，大把世界。我係擔心你哋第日同啲所謂本土物種溝通唔到，佢哋又話要咩「優化」，斬埋你哋乍！
相思樹乙：甲叔，人哋點講我哋控制唔到，但我哋台灣相思係到嘅歷史，只要我哋仲記得，咁就可以同下一代講啦。
相思樹甲：望就咁望啦！
（以上對話俱為筆者主觀幻想，不代表任何相思樹立場，看倌毋須過份解讀。）
總評：行文具怪論的幽默、諷刺，有可讀性，佳。
★宋淑慧
樹仁大學新聞與傳播學系高級講師
前《星島日報》、《星島晚報》總編輯➜➜ 80.90後角度睇新聞諗生活 ，點擊新傳網!
➜➜➜ 重溫! 劉德華獲樹仁大學頒授榮譽文學博士
