今次講「考牌山線」，唔好又話「餐餐都hea遊」，最緊要做好期望管理，量力而為，唔好亂試。
入屯門行山，提起「杯靈雙渡」，相信無行過都有聽過。相傳「杯靈雙渡」、「船灣環湖」及「蚺蛇長嘴」係香港三大行山考牌路線。
「杯」乃「杯渡山」，「靈」指「靈渡山」。前者今稱「青山」，後者轉叫「圓頭山」。如果唔想叫「杯靈雙渡」，不妨改謂「青頭雙渡」。「雙渡」，顧名思義，係「連走」之意。
由青山寺上山，今趟路線程主要在「青山操炮區」範圍內：西望堆填區、下白泥、深圳一帶；東望屯門、元朗市景。論景色，絕對一流（如果天朗氣清、藍天白雲）。
在晴朗的一天出發，「杯靈」肯定令你對「香港大西北」感到前所未有的震撼：無數光禿禿山丘，因花崗岩受到風化和侵蝕，加上大面積伐林，以致水土嚴重流失，山脊多數較低矮和圓鈍，亦是一片滿佈沖溝之劣地。
行經「黃土」，小心跣腳，千萬提神，特別走在著名打卡位「一線脊」之時（一個只有一隻腳咁闊的窄位）。
除咗顧及路況，還需考慮閣下的體能：近13公里的行程，幾乎無樹蔭，陰天還好，如果大熱天時肯定嚇退不少山友。趁炎炎夏日才去，因為夏季吹南風，天特別藍，但影靚相確實要付出曬燶的代價。
如果想玩得安心，不妨選擇在中段的良景坳山路撤退，向東可往良景邨走，或西往所謂的「菠蘿山」再到「日落勝地」下白泥。
假若堅持行畢全程「攞牌」，最後到達「圓頭山」，簡直遇上「救星」一樣，因為越過急斜的北坡，經過一片草林就抵達幽靜的「靈渡寺」，正式結束半日「攞苦嚟辛之旅」。
入黑的「靈渡寺」，反而散發着陣陣特別的涼意呢！
路線：青山寺 －青山 －乾山 －一線脊 －圓頭山 －靈渡寺 (地圖路線)
山線需時：大約8小時（慢行+影相+休息）
去程交通：
屯門西鐵站轉乘輕鐵，青雲站落。
回程交通：
的士返回屯門西鐵站
專欄簡介：
HKD
H = Hiking（遊山玩水）
K = Knowledge（增進知識）
D = Discovery（自我發現）
上山啓發生活再改進社會。Facebook專頁：
https://www.facebook.com/hkd.sanyz
